ചാറ്റൽ മഴ

മഴ നനയാതിരിക്കുവാനായി കടയുടെ വരാന്തയിലേക്ക് കയറി നിന്നപ്പോഴാണ്   യാദൃശ്ചികമായി ഞാൻ അവളെ കണ്ടത്.

സുന്ദരി.

നല്ല അഴക്. 

അംഗലാവണ്യം വിളിച്ചറിയിക്കുന്ന ഇറുകിയ വസ്ത്രം. ഇടുപ്പും കഴിഞ്ഞു താഴോട്ട് വളർന്നു കിടക്കുന്ന കറുത്ത നീണ്ട മുടി. 

ഞാൻ ആ സൗന്ദര്യധാമത്തെ സ്വയം മറന്നു നോക്കി നിന്ന് ആസ്വദിച്ചു.

അവളുടെ അടുക്കൽ ഒരു പയ്യൻ നില്പുണ്ട്; അവളെക്കാൾ പ്രായം കുറവാണ്. ഭാഗ്യം..അവളുടെ ഭർത്താവാകില്ല.

എന്തിനോ വേണ്ടി അവൾ പുറകിലേക്ക് തിരിഞ്ഞു നോക്കിയപ്പോൾ ഞങ്ങളുടെ കണ്ണുകൾ തമ്മിൽ ഇടഞ്ഞു. എന്റെ കണ്ണുകളിലെ ആകർഷണം അവളുടെ കണ്ണുകൾ വായിച്ചെടുത്തു; അവളുടെ കണ്ണുകളുടെ തീവ്രത ഞാനും. പരിസരം മറന്നു ഞങ്ങൾ ഇരുവരും കുറച്ചു സമയം കണ്ണും കണ്ണും നോക്കി നിന്നു.

ചിരിച്ചുകൊണ്ട് പതിയെ അവൾ ഞാൻ നിൽക്കുന്ന വശത്തേക്ക് തിരിഞ്ഞിട്ടു, 7 മാസം വീർത്ത അവളുടെ വയറു കാണിച്ചു.

...ഒന്നും മിണ്ടാതെ ഞാൻ ആ ചാറ്റൽ മഴയത്തേക്ക് ഇറങ്ങി വേഗത്തിൽ നടന്നു.

-രഞ്ജിത്കുമാർ.എം