കളവുപോയ ഹൃദയം

അന്നു നീ മൊഴിചൊല്ലി പിരിഞ്ഞ കാട്ടുചെമ്പക ചോട്ടിലാണിന്നു -
മെൻ ഹൃദയം
അതുകൊണ്ടായിരിക്കാം ഇണയായി കൂടെകൂട്ടിയവളുടെ മൊഴിമൗനങ്ങളിൽ ഞാൻ ഹൃദയ ശൂന്യനായത്

ഒരു സായം സന്ധ്യയില്‍ നിന്റെ മിഴിചൂടേറ്റു കറുത്തുപോയതാ-
ണെന്റെ ചൊടികൾ
അതുകൊണ്ടായിരിക്കാം ചിരിമറന്നൊരു പെണ്ണിന്നും
അടുക്കളയോടു കലഹിക്കുന്നത്

നീ കടൽ കടന്നതിൻ ശേഷമാ
ണത്രേ
എന്റെ സ്വപ്നങ്ങള്‍ തിരയെടുത്തത്
അതുകൊണ്ടായിരിക്കാം തിരയെണ്ണിയൊരു പെണ്ണ് മിഴിന
ഞ്ഞിരിപ്പുണ്ടിവിടെ

നീ പിരിഞ്ഞതിൻ ശേഷമാണത്രേ
എന്റെ തൂവലുകൾ നിറം മങ്ങി വെളുപ്പായത്
അതുകൊണ്ടായിരിക്കാം വറുതിയിലൊരു പെണ്ണ് കനലായത്

നിന്റെ ഒാർമ്മകളിലാണ് ഞാന്‍ പനിച്ചത്
അതുകൊണ്ടായിരിക്കാം
നെറ്റിയിലൊരു ചുംബനമിന്നും പൊള്ളിച്ചത്

- ലിനിഷ് ലാൽ മാധവദാസ്